O equipo de moda

27 de Febreiro do 2015 publicado por o traveseiro

Adiantándonos aos vindeiros artigos e reportaxes de 13 TV, ABC, La Razón… podemos asegurar que dentro de un par de lustros este clube estará asentado na Primeira División da República Popular Española Oriental e gañando sen problemas liga e copa ao máis puro estilo do Dinamo de Berlín dos anos oitenta.

Despois de tres meses de excedencia do blogue estamos de volta. Non me deades a min a grazas, dádellas a un fiel leitor que hoxe botoume en cara que entraba a cotío en O Traveseiro e sempre atopaba a mesma entrada. O lugar exacto onde nos vimos non o podo dicer porque é moito pior que un puticlub, un poboado de venta de droga o mesmo o estadio de Balaídos.

Que o confese el, se non lle dá vergoña.

 

Arquivado en Idas de olla | Comentarios desactivados en O equipo de moda

A reciclaxe de Manuel Pablo

13 de Outubro do 2014 publicado por o traveseiro

E non me estou a referir precisamente a que mudara a súa demarcación no terreo de xogo. Hai quince anos xogaba de lateral dereito e agora se segue a arrastrar polo lateral dereito. A deus grazas este ano aínda non se estreou, aínda que vendo o percal tampouco se ía notar moito.

mypa

Descarregar a foto e volteala

Refírome ao seu look. En 1999 tiña un bo pelamen con peiteado aznariano e afeitado cu de bebé, por non falar das poboadas cellas. Quince anos despois, a súa involución capilar levou a raparse o pouco pelo que lle nascía na cachola para logo non barbearse.

Debe ser unha situación cómica para el, pasarse a cuchilla pola testa e non pola cara, e ir ao barbeiro para que lle retoque as puntas da barba.

Arquivado en Idas de olla | 2 Comentarios »

Cumprimos 7 anos e nin nos decatamos!

20 de Maio do 2014 publicado por o traveseiro

O 17 de Maio este blogue cumpriu anos, data escollida como xa repetín mil veces para facelo coincidir co Día das Letras Galegas e co da Internete. Para non variar, paseino de longo, e claro, agora teño que publicar algo máis extenso para compensar, iso si, sen traspasar o telón de grelos. Non é grande cousa pero velaí vai.

-A fonte de Canaletas
Este era o lamentábel estado da fonte de celebracións do FC Barcelona o outro día (foto tirada na zona de radioloxía do coruñés Hospital Abente y Lago, tamén coñecido coma “o Militar”).

-Welliton & Sissoko, unha de cal e outra de area
Os seareiros celtistas do blogue pídenme encarecidamente un post sobor Welliton, ese brasileiro vido de Rusia con vitola de estrela que fracasou estrepitosamente no campo pero non fóra. A súa detención pola policía por conducir quintuplicando a taxa de alcol en sangue e con exceso de pasaxe pasará á historia negra do futebol galaico e de seguro merecedor dun Renaldinho World Player, aínda que sexa honorífico. Un Welliton por certo que seica na tenda oficial do Celta escrebían mal o seu nome nas camisolas, un feito que me lembra ao debut de Lionel Scaloni co Depor en 1998, que na súa co dorsal 12 poñía SCALONE.

A outra cara da moeda é Ibrahim Sissoko, chegado ao Depor no mercado invernal coma un perfecto descoñecido e con bastantes quilos de máis. Logo de adelgazar Sissoko está a triunfar. Paréceme un bo xogador, fai caneos inverosímis, dá asistencias de gol das que se ven poucas, provoca tarxetas… E o bo roio que transmite, unha deportividade que non se ve nin na liga de peñas, partíndose o cu e departindo amigabelmente con árbitros e rivais. A súa vestimenta “de calle” e os seus peiteados son trending topic na Coruña.

-De branco inmaculado
A cantante cordobesa afincada na Coruña dende hai bastantes anos, Vega, mundialmente coñecida por pasarse medio concurso chorando participar na edición de 2002 de Operación Triunfo, desafiou ás superticións casándose e posteriormente embarcándose o pasado martes 13 de maio. A prensa fíxose eco de tal acontecemento publicando unha morea de fotos dos noivos e convidados na viaxe por catamarán e analizando polo miúdo os atuendos.

El (un dos donos da Estrella Galicia) levaba unha chaqueta blazer beige e garabata celeste, e ela vestía de branco, coma o seu equipo da aialma. Aí Josemari non andivo nada fino.

-Berizzo no Celta
Desta vez volta a Vigo coma adestrador e o certo é que xa nin me lembraba del, só recordo que tiña cara de equino, que repartía bastante leña, e as súas declaracións homófobas de cando xogaba no Marsella, coma por exemplo que “Me causa repulsión que un homosexual se bañe en tu ducha (bañarse nunha ducha?), que te vea las nalgas con deseo y que se emocione, ¡qué asco!”, ou “Prefiero jugar al lado de un drogadicto que de un homosexual, porque las drogas te transforman pero no te degeneran”. Noooon, para nada!

-Comando Calderé
Neste blogue somos fans de Ramón María Calderé dende os seus tempos coma futbolista polas súas pintas e en especial dende 2008, cando foi aldraxado e torturado pola guarda civil en Murcia. Mais agora que volta á palestra polas súas incendiarias roldas de prensa, como esta de hai un par de semanas en Ferrol, esiximos que aposten dunha puta vez por el para adestrar nun clube da elite (o Barça sería unha boa opción e non o paspán de Luis Enrique) e que se confeccione dende xa este proxecto de bufanda da peña Os Curriolos. “Calderé, quen te viu e quen te ve!!”

-Cañita Brava e Sissoko, mesma loita
E voltando con Sissoko, Pableras, responsábel do desarticulado aparato de captación de Renaldinhos & Pavones, mandóume hai unhas semanas un parecido razoábel difícil de entender pero que encaixa perfectamente coa filosofía do blogue. Sissoko con Cañita Brava.

Esta grande achega ocurriúselle durante un desprazamento seguindo ao Depor a Miranda de Ebro. Así nolo explica: “O contexto da foto é que foi sacada á saida dos xogadores do hotel para ir ao estadio (?). Xa saíran todos, xogadores, técnicos, utilleiros, etc.. e faltaba Sissoko, que apareceu de último, medio enfurruñado e pretendendo subir ao autobús pola parte traseira esquerda (onde non hai porta), ante o estupor e as risas da xente. Non faltaron comentarios de que debía estar acabando de comer, que andivo repañando as sobras dos postres dos compañeiros, que non lle botaron nata no flan…” Aí queda iso.

-O penalti de Djukic
O pasado venres estiven a ver en directo o programa radiofónico Turkia. A anécdota futboleira e espectacular da noite correu a cargo de El Hematocrítico, que lembrando o partido da perda da liga do Depor no que se cumpriron 20 anos hai uns días, dixo que el estaba no campo e tan borracho que cando Djukic errou o penal dixo todo cheo de razón que “TRANQUILOS, QUE QUEDA TODA A SEGUNDA PARTE”. Póñome na situación dos colegas e non sabería se cargarme a Djukic, González ou ao Hematocrítico.

 

Arquivado en Actualidade, Idas de olla | 6 Comentarios »

Paulao maravilhão

24 de Abril do 2014 publicado por o traveseiro

Un dos intres máis divertidos á par que lamentabeis da pasada xornada de liga protagonizouno o defensa do Betis Paulao. Primeiro, nunha cesión ao seu porteiro deixou en bandexa o balón a Rochina, do Raio, para que marcara gol. Quince minutos máis tarde marcou un golazo en propia meta. Paulao derrubouse e pediu o cambio.

Esta situación fíxome lembrar de outra delirante acción protagonizada polo brasileiro Evaldo, mellor xogador do Deportivo o ano pasado segundo os propios internautas (eu tamén votei por el). Tras fallar estrepitosamente nunha acción defensiva que case lle custa o gol ao seu equipo en Valencia, Evaldo autolesionouse dándose labazadas na cara.

Vendo a imaxe que nos envía doRCCV (acompañada dunha do atlético Guilavogui con parecidos atributos masculinos), estou a maxinar a Paulao dándose de pirolazos contra si mesmo. Seguro que se facía máis dano que Evaldo, pode que esvaecera… que digo, traumatismo craneoencefálico severo!

Arquivado en Idas de olla | 7 Comentarios »

En que idioma pensas?

18 de Marzo do 2014 publicado por o traveseiro

Leo no Marca que a recente fichaxe do Raio Vallecano, o rumano Razvan Rat fala nada máis e nada menos que sete idiomas. O inglés aprendeuno pola súa conta (xogou no West Ham), ao igual que o ruso, que domina como a súa lingua natal. O francés estudiouno na escola, e o portugués domínao perfectamente ao compartillar vestiario no Shaktar ucraíno con once brasileiros. Deféndese en italiano polo perto que está do seu país, e agora tamén o castelán.

Este caso de políglota lémbrame ao nacho do conto que vai a unha entrevista e o xefe, revisando o currículo flipa da grande cantidade de idiomas que fala o entrevistado, que lle vai comentando o porque de cada un: “Miña nai era francesa, e falábame en francés, e o meu pai alemán, e dende cativo escoitei alemán na casa. Sempre veraneabamos no Algarve, así que estou afeito ao portugués. Estiven estudando cunha beca en Roma, e botei unha moza italiana, así que tamén o falo perfectamente. Despois traballei cinco anos nos Estados Unidos, loxicamente domino o inglés”.

Ao final, o xefe pergúntalle que “falando tantas linguas… vostede en que pensa?”. Rat podería respostar igual aos do Marca se lle fixeran esa pergunta: “Pois en que vou pensar? No que todo o mundo, en follar!”.

Arquivado en Idas de olla | 7 Comentarios »

Si aos disfraces de garda civil…

13 de Febreiro do 2014 publicado por o traveseiro

…non aos árbitros tras as portarías e moito menos á tecnoloxía para evitar goles pantasma.

Arquivado en Idas de olla | 3 Comentarios »

Odio eterno…

16 de Outubro do 2013 publicado por o traveseiro

…AO BAILE MODERNO!!!

Cando dixen que ía publicar un mínimo de tres veces á semana non prometín que ía ser algo interesante.

Arquivado en Idas de olla | 2 Comentarios »

Butragueño no Atco. Celaya

12 de Agosto do 2013 publicado por o traveseiro

Emilio Butragueño retirouse da práctica do fútbol nese equipo mexicano (xa desaparecido) onde xogou tres tempadas, dende 1995 até 1998.

“El Caballero Blanco”, como así era coñecido en México, marcou perto de trinta goles cos toros, algún de bela factura como amosamos na secuencia de fotos.

Arquivado en Idas de olla | 1 Comentario »

Tifo chavista

12 de Marzo do 2013 publicado por o traveseiro

Se de verdade queremos que se fale do vindeiro derbi galego e ademais levantando bochas na caverna mediática, hai que deixarse de caralladas e facer un tifo como este.

“Que horror! Pero como o poñen a esa hora tan tarde?”. Frase acuñada pola inxenua da miña nai ao coñecer que o devandito partido xogárase un venres ás dez menos cuarto da noite. Nais contra o fútbol moderno!

Arquivado en Idas de olla | 3 Comentarios »

Noivas para Lotina

25 de Febreiro do 2013 publicado por o traveseiro

Con razón este negocio, sito no coruñés bairro da Agra do Orzán, xa botou o feche. Xa poden destituír aos corenta e dous treinadores da Liga de Fútbol Profesional, que a Miguel Ángel Lotina Oruetxebarria, como acrónimo M.A.L.O, non lle sairá noiva algunha. Quen carallo vai contratar a este gafe!?

Arquivado en Idas de olla | 5 Comentarios »

« Previous Entries