o traveseiro

O xa por todos e todas coñecido doRCCV, ademais de pasarse de cando en vez polo Ventorrillo (El Vientorrillo, para Paco Vázquez) tamén le o Marca polas mañás. E nunha desas, concretamente o sábado pasado, topouse con esta incualificábel animalada.

O Celta xogaba ese día en Balaídos ás seis da tarde perante o Valencia. Para os do Marca, facíao ás catro no Reyno de Navarra pamplonés. O xogo era arbitrado por Mejuto González (xa retirado). Os dous equipos son adestrados por Marcelo Bielsa, que, como é lóxico xogan co mesmo sistema (4-3-3) aínda que logo no debuxo aparecen con outro (4-2-3-1). Os suplentes de ámbolos dous son os mesmos, todos futbolistas do Athletic Club, e algún nin iso.

Os titulares xogan todos co dorsal 24, agás os porteiros, Iraizoz polo Celta e Muniain (!) no Valencia. Este último tamén forma cos celestes no posto de mediocentro, ao igual que Llorente (lateral esquerdo e interior) e M.Ortiz (de central nun e lateral dereito noutro).

Nos vigueses salientar na aliñación a presencia de catro futbolistas chamados PNSIOKA, que xogan de mediocentro, mediapunta, interior dereito e dianteiro centro. E no Valencia, un tal PEPINO na punta de ataque.

Esta chea de subnormaladas non fai máis que reafirmar a miña teoría de que os xornalistas do Marca e As métense de tódalas substancias habidas e por haber no seu posto de traballo, se é que non acoden xa dende casa colocaos até as cellas.

Para rematar, lembrar que a frase que serve para titular este post e que debería presidir a redacción do xornal, escoiteilla hai uns meses a unha ionki que falaba soa… «es que hay que saber ser drogopendiente», dixo toda chea de razón, «ou drogoindependentista», que salientou un colega meu cando lla contei.

Unha vez, achegámonos eu canda uns amigos ao hotel onde se hospedaba o Deportivo en Donosti a mendigar unhas entradas. Tan só Albert Luque cedeunos as dúas das que dispoñía e até moveu fíos para conseguir algunha máis do clube. Un colega bautizouno coma «El Único», por ser unicamente Luque o que nos atendeu amabelmente e nos conseguiu entradas. Este alcume foi usado durante bastantes meses cando nos referiamos a el.

Isto vén a santo de que estou sopesando referirme ao seareiro deste blogue, doRCCV, coma «O Único». Pois como salientei nalgunha ocasión máis, é o único que a día de hoxe envía achegas á nosa caixa dos correios (otraveseiro@gmail.com). Desta vez, esta castronada:

Para a meirande parte de vós resultará un erro irrelevante poñer «Burgos» no canto de «Bustos» porque Cristian Bustos non é precisamente un futbolista coñecido. De feito, non é de primeira división en canto a calidade futbolística se refire, e agora nin a militancia, xa que deixou o Celta para enrolarse no Sporting de Xixón.

Sexa como for, o erro paréceme monumental porque vai na capa dun xornal deportivo «prestixioso» (AS), aínda que sexa na edición para Galiza e Asturies, e porque unha vez máis deixa a profesión de xornalista á altura da merda. Coño, que é a edición impresa! Que foi dos que traballaban nos xornais exclusivamente para corrixi-los posíbeis erros antes de imprimir os xornais? Asiestaspaña!!

Manda chover na Habana que practicamente o único que estea a encher de lixo este blogue a xeito de comentarios e envíos á nosa caixa dos correios sexa un radical do Celta de Vigo. Leitores deportivistas: xa vos vale.

En fin, que doRCCV mándanos a captura de MarcaTV onde figura o resultado do Rayo Vallecano-Celta do sábado pasado co inxustificábel erro (non sabemos se a conciencia) de colocar o emblema do Deportivo coma se fose o do Celta. Esta castronada obviamente alporiza a seareiros tanto de un coma doutro equipo.

De tódolos xeitos, quero salientar varios dúbidas sobor esa imaxe:
-Quen é o fulano do cadro da esquerda vestido de camisa, chaqueta e garabata de cadros casual subculture e con cara de estreñido?
-Quen é o fulano/a que aparece xunto a Paco Jémez? Un segurata? Gloria Fuertes? Xosé Manuel Beiras?
-Por que leva unhas gafas estilo os lagartos de «V»?

Lugo e Deportivo enfrontáronse onte nun amigábel, e antes do descanso seica houbo un incidente entre seareiros visitantes e policía española. Velaí temos a captura do tratamento da nova na edición dixital en castelán de La Voz de Galicia.

Fago fincapé en que é en castelán porque na edición en galego non aparece esa publicidade á dereita do corpo da nova. Casualidade ou non, meten un anuncio dunha academia especialista en oposicións a policía dentro dunha nova no que, os que xa teñen praza fixa no corpo, pasan de estar sentados comendo pipas e vendo unha pachanga de verán a, para estirar as pernas no descanso, poñerse a mallar nos afeccionados. Un choio cojonudo, pensarán algúns. Do careto de felicidade e gafas de sol do figurante ao máis puro estilo Stevie Wonder xa non opino.

Nós, preferimos seguir os consellos de Albert Pla, e emprazamos aos damnificados a que poñan sempre que poidan, e a todo volume, este temazo de Los Chikos del Maíz. E mira que a min o hip hop nin fu nin fa pero… «Que quede claro, seré sincero: Antes pongo el culo en esquinas que me hago madero!»

A nova está escaneada dun exemplar (do pasado 20 de Xullo) de El Correo Gallego, e foi tirado da Pizzería McRober de Cee (o povo máis europeo da Galiza) polo noso corresponsal na Costa da Morte. Un xornal por certo, que é sen dúbida un dos máis malos do país, pior ca carne de pescozo. Sei do que falo, que, por razóns que non veñen ao caso, foi o primeiro que lía polas mañas durante uns anos.

O pior de todo é que chamarlle luso ao futbolista ferrolterrán non é a única barrabasada do día, porque no corpo da nova din que Juan Domínguez «trata de mejorar en una temporada en la que competirá con JESÚS MUÑOZ, Álex Bergantiños y Rubén Pérez por la titularidad en el centro del campo». Suponse que se referirán a Jesús Vázquez, máis dáse a casualidade que Jesús Muñoz, coñecido por estes lares como Jesusinho Munhões, foi un de tantos e tantos paquetes fichados por Lendoiro que non xogaron partidos oficiais no Deportivo (tan só un encontro en catro anos en nómina). Todo deus di cada dous por tres que fichou a Bebeto, Mauro Silva, Rivaldo ou Makaay, pero aquí estamos nós para lembrar que morralla tamén trouxo para dar e tomar.

Coidadiño, que os leitores vanse empachar de tanto galego!

O xornal deportivo coruñés DXT CAMPEÓN é un deses medios de comunicación galegos (como a inmensa maioría) aos que o idioma galego lles importa tres pementos e sen embargo, o día 25 de Xullo (Día da Pátria para uns, de Galiza ou do Apostol… para outros) publican a portada integramente en galego, porque «una vez al año no hace daño», pensarían os seus responsábeis. Neste caso até tiveron a feliz (?) ocorrencia de suplir a clásica cor vermella do cabezallo pola bandeira galega.

Este exercicio de galeguismo é todo en plan postureo, un xesto de cara a galería, xa que logo abres o xornal e vas flipando conforme pasas as páxinas porque non atopas absolutamente ningunha nova nin artigo en galego. Todo o xornal está escrito en castelán na súa practica totalidade (40 páxinas) agás:

1. A portada paripé, que tedes aquí enriba.
2. A viñeta do polifacético Antón Lezcano (Nicetrip, Zapping, Turkía…), que xa traballara no xornal cando botara andar hai dezaseis anos e que considero que hai que poñer pola súa interese e do pouco salvábel do xornal.

3. O nome do Trofeo Festas do Burgo.
4. Os teléfonos de interese (hospitais, servizos sociais…).
5. A programación da TVG, na que se inclúe a sipnose do filme «Sempre Habana», que botan de madrugada.
6. A publicidade da Pulpeira A Lanchiña.

Para máis amole, na contracapa coñecemos que o torneo Cidade da Coruña de tenis disputouse nun estraño lugar chamado LA Zapateira.

As explicacións ás deturpacións de topónimos (o do outro é un caso perdido) hai que pedilas a dxt@deportecampeon.com ou mesmo vía twitter ou facebook, xa que o primeiro xornal deportivo de Galiza, a parte de non usar o galego, tamén é o primeiro e pode que único, que non ten páxina web.

O pasado domingo confirmouse o descenso do Pontevedra a Terceira División. A traxedia mascábase dende hai semanas, e como soe pasar nos casos en que un equipo con aspiracións cae a postos de descenso, os afeccionados vanse a polos xogadores. Hai uns días tocoulle a china a Iban Espadas. Nin a Operación Xerónimo nin hostias, en La Voz de Galicia optan por facer un seguimento minuto a minuto máis interesante, o da persecución do futbolista por parte duns… HOOLOGANS (?)

Entendo que é moitísimo máis grave tatuarse mal a palabra HOOLIGANS, mais iso non quita que é unha metedura de gamba coma un piano, e non é a única do texto. Tema a parte é o incidente en si, que había que estar alí para ver o que realmente aconteceu, pero se é así semella máis unha peli de acción que outra cousa. E sen deixar de lado a este xornal, e recén saído do forno…

O Deportivo vence en Riazor ao ATHLETIC DE XIXÓN. E noutro partido da xornada o Málaga fixo o propio co SPORTING DE BILBAO, ou xa postos, de Santurtzi, non te fode!

Moitas grazas a Alberto Michijhense (Dombate is not Michigan!) pola primeira imaxe.

Na vindeira xornada de liga enfróntanse no Calderón o Atlético e Real Sociedade. Dende que xogaron na primeira volta gardaba o recorte de portada dos liantes do Marca (sempre na procura da paz social e contra a violencia), un par de días despois de disputarse o encontro.

Relativo a isto engadir que…

1. Os da Peña Mújika deben ter unha vista de lince para ollar o brazalete do capitán do Atlético dende a súa bancada, a bastantes metros do campo, e con pistas de atletismo polo medio.

2. O Atlético de Madrid só usa ese brazalete nos partidos internacionais, nos de liga adoitan a levar un co escudo do equipo. Tamén é moita casualidade que xoguen en Anoeta e poñan ese, igual tiñan o titular a lavar.

3. Na nova de dentro poñen que o do brazalete «fue otro de los motivos que los radicales de la Real esgrimieron para convertir en su cántico favorito -españoles hijos de puta- que gritaron casi sin parar durante los 90 minutos». En que quedamos? Segundo o titular lles cantaron fillos de puta polo brazalete, e resulta que logo foi outro dos motivos, mais non din cales. E o mellor de todo… alguén cre que un grupo de afeccionados estiveron berrando unha soa frase case sen parar durante hora e media?

4. Non publican nada de que noutro encontro desa xornada, o Real Madrid-Athletic de Bilbao os ultras locais estiveron todo o puto partido (como tódolos anos) poñendo verdes aos bascos («puto vasco el que no bote» p.ex.). Se tan españois son e consideran a Euskadi unha parte de España… por que insultan aos seus compatriotas das «Vascongadas»?

5. Seguen a mesma liña doutras publicacións editadas na capital do pequeno imperio. Un xornalismo moderno, serio e dinámico, que nos informa con total independencia e obxectividade de todo o que acontece.

Coma se no Deportivo non aconteceran xa bastantes cousas das que avergoñarse, van e lle dedican no voceiro do Clube unha portada (e entrevista interior) á petarda de Marta López, de Gran Hermano 12.

Os do Schalke 04 tiñan a Hitler como afeccionado e nós a esta

Esta imbécil profunda fíxose famosa por estes lares por poñer a caer dun burro aos galegofalantes, cualificándoos de brutos, paletos e ignorantes, verbas que á larga custáronlle a expulsión e o desprezo absoluto na nosa terra, menos para os pimpíns do panfleto deportivista.

O que pretenden no Deporsport (e iso que aínda non lin a entrevista) sabémolo de sobra: utilizala para atacar a La Voz de Galicia, argumentando que este xornal maltratouna, cando o certo, e non é por defendelos, é que foi un máis de tantos que criticaron as súas defecacións verbais, agás os medios da estrema dereita que a defenderon a capa e espada porque «confirma la imposición chapucera del gallego» (?).

Por certo, que a piques de publica-lo post decátome que até na referencial web sobre as mongoladas do xornalismo deportivo, La Libreta de Van Gaal, fanse eco desta abraiante portada.

ACTUALIZACIÓN.
Porque o publicou antes ca min e porque vale moitísimo máis a pena ler que este, o post do amigo Mr.Tichborne sobre a vergonhenta (que non vergonzante) portada do Deporsport… AQUÍ.

Lotina puxo a xogar o outro día un equipo coa media de idade máis alta dos que aliñara até o de agora, e se gañou. Unha casualidade como outra calquera. Mais para os do órgano de propaganda do Clube, a falta de ideas, xa lles serviu para levala á capa do xornal de onte. E de que maneira, oiga…

Supoño que a tremenda parida (o pior de todo, o touro branquiazul) se lles ocorrería ollando a botella de brandy que de seguro teñen agochada na redacción para botarlle aos cafés ou meterlle algún que outro lingotazo a morro.

Estou pensanco que, coa mesma, cando gañemos co once máis novo igual nos deleitan cunha ilustración a modo dun bote de champú Nenuco ou algho.

Por outra banda, hoxe souben que o seleccionador español Vicente Del Bosque estreouse como asesor de Iberdrola. Paréceme moi ben, porque de seguro que a súa experiencia e sabedoría no eido das enerxías renovábeis seralles moi útil, mais agora só falta que poñan a un electricista a asesorar a Guardiola ou Mourinho.