Cumprimos 7 anos e nin nos decatamos!

20 de Maio do 2014 publicado por o traveseiro

O 17 de Maio este blogue cumpriu anos, data escollida como xa repetín mil veces para facelo coincidir co Día das Letras Galegas e co da Internete. Para non variar, paseino de longo, e claro, agora teño que publicar algo máis extenso para compensar, iso si, sen traspasar o telón de grelos. Non é grande cousa pero velaí vai.

-A fonte de Canaletas
Este era o lamentábel estado da fonte de celebracións do FC Barcelona o outro día (foto tirada na zona de radioloxía do coruñés Hospital Abente y Lago, tamén coñecido coma “o Militar”).

-Welliton & Sissoko, unha de cal e outra de area
Os seareiros celtistas do blogue pídenme encarecidamente un post sobor Welliton, ese brasileiro vido de Rusia con vitola de estrela que fracasou estrepitosamente no campo pero non fóra. A súa detención pola policía por conducir quintuplicando a taxa de alcol en sangue e con exceso de pasaxe pasará á historia negra do futebol galaico e de seguro merecedor dun Renaldinho World Player, aínda que sexa honorífico. Un Welliton por certo que seica na tenda oficial do Celta escrebían mal o seu nome nas camisolas, un feito que me lembra ao debut de Lionel Scaloni co Depor en 1998, que na súa co dorsal 12 poñía SCALONE.

A outra cara da moeda é Ibrahim Sissoko, chegado ao Depor no mercado invernal coma un perfecto descoñecido e con bastantes quilos de máis. Logo de adelgazar Sissoko está a triunfar. Paréceme un bo xogador, fai caneos inverosímis, dá asistencias de gol das que se ven poucas, provoca tarxetas… E o bo roio que transmite, unha deportividade que non se ve nin na liga de peñas, partíndose o cu e departindo amigabelmente con árbitros e rivais. A súa vestimenta “de calle” e os seus peiteados son trending topic na Coruña.

-De branco inmaculado
A cantante cordobesa afincada na Coruña dende hai bastantes anos, Vega, mundialmente coñecida por pasarse medio concurso chorando participar na edición de 2002 de Operación Triunfo, desafiou ás superticións casándose e posteriormente embarcándose o pasado martes 13 de maio. A prensa fíxose eco de tal acontecemento publicando unha morea de fotos dos noivos e convidados na viaxe por catamarán e analizando polo miúdo os atuendos.

El (un dos donos da Estrella Galicia) levaba unha chaqueta blazer beige e garabata celeste, e ela vestía de branco, coma o seu equipo da aialma. Aí Josemari non andivo nada fino.

-Berizzo no Celta
Desta vez volta a Vigo coma adestrador e o certo é que xa nin me lembraba del, só recordo que tiña cara de equino, que repartía bastante leña, e as súas declaracións homófobas de cando xogaba no Marsella, coma por exemplo que “Me causa repulsión que un homosexual se bañe en tu ducha (bañarse nunha ducha?), que te vea las nalgas con deseo y que se emocione, ¡qué asco!”, ou “Prefiero jugar al lado de un drogadicto que de un homosexual, porque las drogas te transforman pero no te degeneran”. Noooon, para nada!

-Comando Calderé
Neste blogue somos fans de Ramón María Calderé dende os seus tempos coma futbolista polas súas pintas e en especial dende 2008, cando foi aldraxado e torturado pola guarda civil en Murcia. Mais agora que volta á palestra polas súas incendiarias roldas de prensa, como esta de hai un par de semanas en Ferrol, esiximos que aposten dunha puta vez por el para adestrar nun clube da elite (o Barça sería unha boa opción e non o paspán de Luis Enrique) e que se confeccione dende xa este proxecto de bufanda da peña Os Curriolos. “Calderé, quen te viu e quen te ve!!”

-Cañita Brava e Sissoko, mesma loita
E voltando con Sissoko, Pableras, responsábel do desarticulado aparato de captación de Renaldinhos & Pavones, mandóume hai unhas semanas un parecido razoábel difícil de entender pero que encaixa perfectamente coa filosofía do blogue. Sissoko con Cañita Brava.

Esta grande achega ocurriúselle durante un desprazamento seguindo ao Depor a Miranda de Ebro. Así nolo explica: “O contexto da foto é que foi sacada á saida dos xogadores do hotel para ir ao estadio (?). Xa saíran todos, xogadores, técnicos, utilleiros, etc.. e faltaba Sissoko, que apareceu de último, medio enfurruñado e pretendendo subir ao autobús pola parte traseira esquerda (onde non hai porta), ante o estupor e as risas da xente. Non faltaron comentarios de que debía estar acabando de comer, que andivo repañando as sobras dos postres dos compañeiros, que non lle botaron nata no flan…” Aí queda iso.

-O penalti de Djukic
O pasado venres estiven a ver en directo o programa radiofónico Turkia. A anécdota futboleira e espectacular da noite correu a cargo de El Hematocrítico, que lembrando o partido da perda da liga do Depor no que se cumpriron 20 anos hai uns días, dixo que el estaba no campo e tan borracho que cando Djukic errou o penal dixo todo cheo de razón que “TRANQUILOS, QUE QUEDA TODA A SEGUNDA PARTE”. Póñome na situación dos colegas e non sabería se cargarme a Djukic, González ou ao Hematocrítico.

 

Arquivado en Actualidade, Idas de olla | 6 Comentarios »

Paulao maravilhão

24 de Abril do 2014 publicado por o traveseiro

Un dos intres máis divertidos á par que lamentabeis da pasada xornada de liga protagonizouno o defensa do Betis Paulao. Primeiro, nunha cesión ao seu porteiro deixou en bandexa o balón a Rochina, do Raio, para que marcara gol. Quince minutos máis tarde marcou un golazo en propia meta. Paulao derrubouse e pediu o cambio.

Esta situación fíxome lembrar de outra delirante acción protagonizada polo brasileiro Evaldo, mellor xogador do Deportivo o ano pasado segundo os propios internautas (eu tamén votei por el). Tras fallar estrepitosamente nunha acción defensiva que case lle custa o gol ao seu equipo en Valencia, Evaldo autolesionouse dándose labazadas na cara.

Vendo a imaxe que nos envía doRCCV (acompañada dunha do atlético Guilavogui con parecidos atributos masculinos), estou a maxinar a Paulao dándose de pirolazos contra si mesmo. Seguro que se facía máis dano que Evaldo, pode que esvaecera… que digo, traumatismo craneoencefálico severo!

Arquivado en Idas de olla | 7 Comentarios »

O pulso do beticismo

22 de Abril do 2014 publicado por o traveseiro

“Michael J. Fox uno di noi”

O pasado 11 de Abril celebrouse o Día Mundial do Parkinson. Loxicamente solidarizámonos con tódol@s doentes (todos coñecemos a xente que a padece), incluíndo aos béticos que fan pintadas nas paredes da súa cidade deportiva e que non lles chega co drama da situación do seu Betis que tamén padecen esa horrible enfermidade.

Chámame a atención ademais o sacrilexio de pintar por enriba do emblema do clube agravándoo ao poñer o til en “Calderón” (coidado, pode ser unha sombra!). Aínda que non o acentuaran por esta vez tampouco pasaba nada.

P.D. A persoa que de xeito anónimo me mandou un aviso vía tumblr de que mirara o correio, que mo envíe de novo porque non recebín nada para O Traveseiro recentemente. Obrigado.

Arquivado en Analfabestas | 2 Comentarios »

Clases de gramática e ortografía para ultras XA!

14 de Abril do 2014 publicado por o traveseiro

A imaxe foi tirada no último derbi sevillano de liga que, salvo milagre e como mínimo, non se repetirá até dentro de dous anos.

Os seareiros sevillistas amosan unha faixa para putear aos seus rivais coa lenda “Miraz tu amargura”, que dana a vista colla por onde se colla. Ao igual que a recente analfabestada publicada aquí dos do Valladolid, tamén utilizan papel marron de embalar e letras a spray con amago de tipografía galega.

Mais si os puceláns meten a pata rematando en “R” un imperativo, estes non cometen ese erro pero casi era mellor. A castronada consiste en substituír o “D” de “mirad” por unha “Z”. Para máis amole, entendo que se poñen “Mirad” como segunda persoa do plural, logo non poden completar a frase coa segunda do singular: “tu amargura”.

A forma correcta sería: “Mirad vuestra amargura”.

EDITADO

Os comentaristas, sempre atentos, alértanme do erro. Efectivamente, non é unha gralla gramatical. Parafraseando aos Kortatu “Sombras verdes (neste caso do Betis) acechaban”. Unha sombra diagonal sobre o P de “paz” fai que se converta nunha R e de aí o erro. Pido desculpas e fico máis tranquilo porque o erro era paranormal de todo. Mais non quita que hai que currarse mellor as faixas, coño!

Arquivado en Analfabestas | 7 Comentarios »

Carlos Terrazas, popeiro español

27 de Marzo do 2014 publicado por o traveseiro

Seguimos coa xeira de treinadores de segunda rariños para achegarnos á figura de Carlos Terrazas. Cada vez que vexo ao técnico do Mirandés lémbro dun colega que hai dous anos, cando treinaba ao Guadalaxara, dicía que non remataba a tempada, e non precisamente porque fose cesado. E tamén do marabilloso mundo do pop oitenteiro español… dos Germán Coppini, Antonio Vega, Enrique Sierra

Non o sabemos, pero igual a Terrazas até entrevistouno hai trinta anos Paloma Chamorro para La Edad de Oro ou Jesús Ordovás en Diario Pop de Radio 3, dentro do seu monotema da movida madrileña.

E ollo para os que saiades con que teño prexuizos artísticos por non meter no saco a Iosu Eskorbuto, Natxo Cicatriz ou Lois Pereiro, pero alomenos eses non vestían chaquetas americanas de talla XXL coma os outros.

 

Arquivado en Cuspidinhos | 2 Comentarios »

Víctor Muñoz volveuno conseguir

24 de Marzo do 2014 publicado por o traveseiro

Hai case catro anos publicabamos a arrepiante imaxe (semella que tirada dun filme de terror) do outrora xogador Víctor Muñoz con Pardeza. Víctor está de volta no Zaragoza, e outra vez de soterrador-treinador, fichado para a ocasión por Suso García Pitarch, un dos executivos máis escuros e mafiosos do fútbol español, do que xa dimos boa conta del tamén por estes lares.

O fulano tampouco é moi agraciado fisicamente, aínda menos ao lado do novo técnico do Zaragoza. Un Víctor por certo, que saíu a colación onte vendo o seu partido contra o Depor. Comentabamos a manía que colleron os futbolistas e técnicos de taparse a boca cando falan, a xeito de que non lles lean os beizos para así logo saír as conversas subtituladas en televisión, polo xeral críticas a treinador e/ou compañeiros. O curioso é que o fan futbolistas de segunda que na vida sairán en Deportes Cuatro nunha situación comprometida desas.

O caso é que se me ocorreu maxinar a Víctor Muñoz tapando a boca falando, por exemplo, co seu segundo. Opino que nese caso tería que usar como mínimo unha cesta punta.

Arquivado en Adefesios | 4 Comentarios »

En que idioma pensas?

18 de Marzo do 2014 publicado por o traveseiro

Leo no Marca que a recente fichaxe do Raio Vallecano, o rumano Razvan Rat fala nada máis e nada menos que sete idiomas. O inglés aprendeuno pola súa conta (xogou no West Ham), ao igual que o ruso, que domina como a súa lingua natal. O francés estudiouno na escola, e o portugués domínao perfectamente ao compartillar vestiario no Shaktar ucraíno con once brasileiros. Deféndese en italiano polo perto que está do seu país, e agora tamén o castelán.

Este caso de políglota lémbrame ao nacho do conto que vai a unha entrevista e o xefe, revisando o currículo flipa da grande cantidade de idiomas que fala o entrevistado, que lle vai comentando o porque de cada un: “Miña nai era francesa, e falábame en francés, e o meu pai alemán, e dende cativo escoitei alemán na casa. Sempre veraneabamos no Algarve, así que estou afeito ao portugués. Estiven estudando cunha beca en Roma, e botei unha moza italiana, así que tamén o falo perfectamente. Despois traballei cinco anos nos Estados Unidos, loxicamente domino o inglés”.

Ao final, o xefe pergúntalle que “falando tantas linguas… vostede en que pensa?”. Rat podería respostar igual aos do Marca se lle fixeran esa pergunta: “Pois en que vou pensar? No que todo o mundo, en follar!”.

Arquivado en Idas de olla | 7 Comentarios »

Rafinha: “que me meo toda”

11 de Marzo do 2014 publicado por o traveseiro

DoRCCV mándame a captura da imaxe de Rafinha no palco VIP de Balaídos partíndose o cu tras encaixar o Celta o definitivo 0-2 do outro día perante o Atlético. En Vigo sentou como unha patada nos collóns, e é lóxico porque por aquelos lares están convencidos que Rafinha é seareiro do Celta por aquelo de cando era cativo viver en Vigo e ser fillo de Mazinho. Até bica a camisola e todo! Nada máis lonxe da realidade. A Rafinha, como bo brasileiro (agás casos contados) non é de nengún equipo. De feito, o Celta ten toda a pinta de importarlle tres pementos, como así o amosan as imaxes.

Inevitábel lembrarse nese mesmo emprazamento a Iván Campo e Roberto Carlos escarallándose durante unha chosca do Celta ao Madrid en 1999, ou de Manuel Pablo ríndose na banda de quencemento dun Atlético de Madrid 6 – Deportivo 0. Os primeiros xustificábanse que estaban a saudar ás súas respectivas donas, e o segundo que ten ese problema da risa nerviosa nos momentos fodidos. Pódese crer, porque se non é así, nada xustifica que na rolda de prensa do plantel do Deportivo neste verán na que “ameazaban” con descender ao Clube coas súas denuncias, o capitán canario saira cun sorriso de orella a orella que se estiveramos nun país do leste de Europa no canto da Coruña Manuel Pablo de seguro sería axusticiado nada máis saír á rúa.

E voltando á amor ás cores dos futbolistas do Celta, lin hai pouco nalgúns medios noseiquehostias de que Iago Falqué, futbolista vigués que xoga no Raio Vallecano, é celtista. Hai anos, cando Falqué era un neno, escoitei na Radio Galega unha entrevista ao seu pai a conto da súa fichaxe polo FC Barcelona. Este laiábase de que tivera que emigrar a Barcelona, pero que era a mellor oferta, e confirmou que moi ao seu pesar, o seu fillo ERA SEAREIRO DO DEPORTIVO, que se fixera deste equipo namorado do xogo de Rivaldo. Non vén a conto pero urxe salientar que a nai, Carmela Silva, desempeña nada máis e nada menos que dez cargos en política, pasándose polas súas partes a norma de incompatibilidades.

E para rematar, comentar que outro futbolista do Celta que poñen polas nubes polo seu compromiso cos celestes, o ferrolán Alex López, tamén é de toda a vida do Deportivo. Fontes fidelignas confírmanme que adoitaba a xogar ao fútbol na escola vestido cunha camisola do Depor co nome de Djalminha nas costas. Disque hai unha foto e pode que tente facerme cunha copia.

P.D. Coma non teño twitter, digoo aquí a pesares de que hai unha posibilidade entre un millón que o tipo vaia ler isto: O que me mangaches as zapas Adidas Spezial de ante azul mariño coas tres bandas celestes no vestiario da piscina da Casa da Auga eres un auténtico cabrón. Porque se podes permitirte pagar ese abono mensual tamén podes mercar esas zapatillas, pedazo de rata.

 

Arquivado en Actualidade | 12 Comentarios »

Valladolid, o mellor castelán do mundo?

25 de Febreiro do 2014 publicado por o traveseiro

É por todos e todas de sobra coñecido que os afeccionados do Valladolid son do peorciño do Estado en canto a fidelidade ás súas cores e en animosidade, como na maioría dos afeccionados castelán-leoneses (agás o Mirandés e Ponferradina, baixo o meu punto de vista). Non enchen os seus campos, non viaxan, e os que si van ao fútbol ofrecen vergoñentas imaxes envoltos en mantas. Só lles falta a bata e as zapatillas.

E tamén sabiamos, ou cando menos estamos fartos de escoitalo, que en Valladolid fálase o mellor castelán do mundo. Pois vai ser que niso tamén fan o ridículo, oigan.

ANALFABESTAS RVCF

A foto foi tirada nesta pasada xornada. Nela aprézase a gaiola onde se ubican dous dos grupos ultras locais, os dereitistas Ultra Violetas e os “apolíticos” Komando Violeta. Hai outros dous grupos, de esquerdas, Frente Esgueva e Fossa Garrafoni, que ubícanse en diferentes bancadas por non se sabe moi ben que motivos pero que aínda que se xuntaran serían igualmente catro e o bombo.

Pero vamos aos da foto. Os tipos sacan unha faixa cunha lenda dirixida aos xogadores aos que esixen a que se deixen a alma no campo, que para iso eles se deixan as gorxas. Á marxe da cutrez da faixa, escrita a pulso e spray sobre papel marrón de embalar… contén unha importante gralla gramatical.

Efectivamente, ese “dejaRos” dana a vista, porque tratándose dun imperativo, a forma correcta sería DEJAOS. Ofrece pouca xustificación, a non ser que fagan como os de Extremoduro, que cando presentaran o seu disco en directo “Iros todos a tomar por culo”, Robe explicara en rolda de prensa (sen que ninguén lles preguntase polo erro) que puxeron IROS no canto de IDOS porque se non a xente pensaría que estaban TOLOS.

Queda por saber porque salientan a O de “dejaros”. Segurante represente o ollo do cu do Real Valladolid.

 

Arquivado en Analfabestas, Pregunta para nota | 3 Comentarios »

Si aos disfraces de garda civil…

13 de Febreiro do 2014 publicado por o traveseiro

…non aos árbitros tras as portarías e moito menos á tecnoloxía para evitar goles pantasma.

Arquivado en Idas de olla | 3 Comentarios »

« Previous Entries Next Entries »